Sindhuraruna vigraham trinayanam manikya mouli spurath

Thara Nayaga sekaram smitha mukhi mapina vakshoruham,

Panibhayam alipoorna ratna chashakam rakthothpalam vibhrathim,

Soumyam ratna gatastha raktha charanam, dhyayeth paramambikam.

కరుణారసతరంగిణి వారాహి 
- లక్ష్మీ రమణ 

ఆషాడం వచ్చేసింది . చిరు  జల్లులతో పుడమి పులకరిస్తూ ఉంటుంది. ఆడపడుచులంతా చేతికి గోరింటాకులు పెట్టుకొని అమ్మవారి ప్రతిరూపాల్లా నట్టింట్లో తిరుగుతుంటే, ఆ అమ్మ అనుగ్రహాన్ని అర్థిస్తూ రైతన్నలు నాగలి పట్టి పొలాల్లో శ్రమిస్తూ ఉంటారు.  ఇదే సమయంలో వచ్చే వారాహీ నవరాత్రులు చాలా మహిమాన్వితమైన పండుగరోజులు. వీటిని అట్టహాసంగా జరుపుకొనవసరంలేదు .  ప్రతిరోజూ సాయంకాలం అమ్మవారికి దీపం పెట్టి, దుంపలు నైవేద్యంగా సమర్పించి వేడుకుంటే చాలు అనుగ్రహమిచ్చి పంటలు పండేలా దీవిస్తుంది. రాత్రంతా మన వెంటే ఉంటూ, మనల్ని , మన పంటల్ని రక్షిస్తుంది.  సంపదల్ని అనుగ్రహిస్తుంది . అసలు ఈ దేవదేవి మహత్యాన్ని గురించి ఎంతగా చెప్పుకున్న తక్కువే ! వివిధ పురాణాల్లో ఈ దేవి గురించిన కథనాలూ ఎన్నో మనకి  కనిపిస్తాయి.    

ఇచ్ఛాశక్తి ప్రసాదిని - లలితాదేవి , జ్ఞానశక్తి ప్రదాయిని -శ్యామలాదేవి , క్రియా శక్తి ప్రదాత -వారాహి దేవి.  ఈ ముగ్గురమ్మల అనుగ్రహం లేనిదే మనం ఏమీ చెయ్యలేము .  క్రియాశక్తి ప్రదాయని అయినా అమ్మవారిని వారాహిగా ఆరాధించుకొనే మహిమాన్వితమైన రోజులు 

ఆషాఢ శుద్ధ పాడ్యమి నుండీ అంటే 2023 జూన్ 19 వ తేదీ నుండీ మొదలుకాబోతున్నాయి. 

అమ్మవారు సంప్రదాయిని , సంప్రదాయేశ్వరి, సదాచార ప్రవర్తిక! అందువల్ల కావాల్సిందల్లా స్వచ్ఛమైన మనసుతో  సంప్రదాయ బద్ధంగా అమ్మని ఆరాధించి, అనుగ్రహించమని వేడుకోవడమే ! అమ్మవారు మన ఇంటికి వస్తే , ఆమెని సాదరంగా ఆహ్వానించి , చక్కగా పీటవేసి కూర్చోబెట్టి,  కుంకుమ, పసుపు , గంధం, బట్టలు , తాంబూలం సమర్పిస్తామా లేదా ? అదే భావన పూజలోనూ ఉండాలి .  గమనిస్తే ఈ ఉపచారాలన్నీ మనం చేసే పూజలోనూ ఉంటాయి కదా ! అమ్మకి మనసు ముఖ్యం. మనకి యెంత మంత్రం పరిజ్ఞానం ఉందొ అక్కరలేదు.  

మంత్రం ఉండి చేసుకోగలగడం, అదృష్టమే . అయితే గురూపదేశం లేకుండా, మంత్రాల జోలికి వెళ్ళకండి .  డాక్టర్ సలహా లేకుండా వేసుకొనే మాత్రల్లా అవి ఒక్కోసారి వికటించే ప్రమాదముంది. కనుక చక్కని మనసుతో యథా శక్తి అమ్మని వేడుకుంటే చాలు . 

ఇక, వారాహి స్వరూపంలో అమ్మవారి ఆవిర్భావాన్ని గురించి అనేక పురాణాలు చెప్పాయి. వాటిని ఒక్కసారి స్మరించుకుందాం .  గుర్తుంచుకోండి , ఇలా అమ్మవారి దివ్యమైన కథలని చెప్పుకోవడం, తద్వారా స్మరించుకోవడం అనంతమైన పుణ్యాన్ని అందిస్తుంది , అందులో సందేహమే లేదు.  నారద మహర్షి తన భక్తి సూత్రాలలో  శ్రవణం, స్మరణం అనేవి కూడా ఆ పరమాత్మని చేరుకోవడాని మార్గాలే అని చెప్పిన విషయాన్ని ఇక్కడ గుర్తు చేసుకుందాం . 

దేవీభాగవతం, మార్కండేయ పురాణం తదితరాల్లో అమ్మవారి అవతార ప్రశస్తి కనిపిస్తోంది. హిరణ్యాక్షుని బారి నుండీ భూమాతని రక్షించినవారు వరాహ స్వామి. ఆయన స్త్రీ స్వరూపమే వారాహీ మాత.  ఈవిడ సప్తమాతృకల్లో ఒకరిగా కీర్తిని పొందారు . దేవీ భాగవతంలో అమ్మావారు రక్త బీజుణ్ణి సంహరించడానికి తన నుండీ ఏడు శక్తులని సృష్టించారు.  వారే సప్త మాతృకలు . వారిలో అమ్మవారి వీపుభాగం నుండీ ఉద్భవించిన క్రియా శక్తి వారాహి . మశ్చ్య పురాణం ప్రకారం అమ్మవారిని అంధకాసుర సంహారం కోసం పరమేశ్వరుడు సృష్టించారు. 

వారాహి విష్ణు స్వరూపిణి .  కనుక ఆమె వరాహ స్వామి లాగానే శ్యామల వర్ణంలో ఉంటారు . నాగలి, రోకలి ఆమె ప్రధాన ఆయుధాలు . ఇవి సస్యాల అభివృద్ధిని సూచిస్తున్నాయి కదా ! సాధారణంగా పాము, దున్నపోతు,  సింహం అమ్మవారి వాహనాలుగా ఉంటాయి.  ఇది దేవి దైవత్వాన్ని అలాగే తిరిగి వ్యవసాయ అభివృద్ధిని సూచించేవిగా ఉండడం గమనార్హం . మ్మవారి రూపం చాలా భయం గొలిపేదిగా ఉంటుంది . అయినప్పటికీ కూడా ఆ దేవదేవి సులభంగా అనుగ్రహిస్తారు . 

వారాహీ దేవిని సాయం సమయంలో ఆరాధించడం ఉత్తమం. అమ్మావారు రాత్రంతా కూడా నగర సంచారం చేస్తూ , రక్షిస్తూ ఉంటారు. గ్రామాలని, తన భక్తులనీ, వారు నిద్రించే సమయంలో కూడా చల్లగా కాచే తల్లి వారాహి .  అందుకే సాయం సమయంలో సూర్యాస్తమయం తర్వాత చేసే వారాహీ ఆరాధన గొప్ప ఫలితాలని అనుగ్రహిస్తుంది . అన్ని సమస్యలూ వారాహీ అనుగ్రహం వలన తొలగిపోయి సానుకూల ఫలితాలు లభిస్తాయి.  కాబట్టి , ఈ సమయాన్ని చక్కగా సద్వినియోగం చేసుకోండి . 

శ్రీ వారాహీ అనుగ్రహ సిద్ధిరస్తూ!! 

శ్రీ మాత్రే నమః  

#omsrimatrenamaha #varahi #lalita #lalitha #varahinavaratri

Varahi Navaratri, Navratri, Varahi, Lalita, Lalitha, Om Sri Matre Namaha, Varahi Maa,