కవచాన్ని గురించి తెలుసా!
- లక్ష్మి రమణ 

యుద్ధానికి వెళ్లే యోధులు కవచాన్ని ధరించి వెళతారు . అప్పుడు శత్రువులు ఉపయోగించే ఆయుధాల ప్రహారం నుండీ ఆ కవచాలు యోధులని కాపాడతాయి. రోగాలు మనుషుల  దాడికి పాల్పడతాయి . మనుషులు తమ రోగనిరోధక శక్తి ద్వారా వాటి నుండీ బయట పడేందుకు పోరాడుతూ ఉంటారు. కవచం అనే పేరుతొ మనకి అనేకమైన దేవీ  దేవతలకి సంబంధించిన కవచాలు అందుబాటులో ఉన్నాయి . ఇవి మనం ఒక కవచాన్ని తొడుక్కున్నట్టుగా మనల్ని రక్షిస్తాయా ? 

ఒక కవచం తొడుక్కుంటే కేవలం బాహ్యమైన దాడి నుండే రక్షణ లభించవచ్చు . కానీ ఈ మంత్ర పూరితమైన కవచాలు అంతర్గత శక్తిని జాగృతం చేస్తాయి . మంత్రం దేవత మనకి రక్షగా ఉండేలా అనుగ్రహిస్తాయి .  మనలో అంతర్గతమైన, బహిర్గతమైన శక్తిని జాగృతం చేసి కవచంలా మనని రక్షించే మంత్ర రక్షలే కవచాలు. శ్రీ దుర్గా కవచం, శ్రీ నృసింహ కవచం , శ్రీ హనుమత్కవచం, శ్రీ సుబ్రహ్మణ్య కవచం వంటి ఎన్నో మంత్ర కవచాలు మహనీయులైన మన ఋషులు, దేవతలు అందించారు .  ఉదాహరణకి నృసింహ కవచం ఆయన అనంగు భక్తుడు, సేవకుడు అయినా ప్రహ్లాదుడు బ్రహ్మానందపురాణంలో చెబుతారు . శ్రీ హనుమత్కవచాన్ని వశిష్ఠ మహర్షి అందించారు. శ్రీ సుబ్రహ్మణ్య కవచాన్ని బ్రహ్మగరే స్వయంగా చెప్పారు . ఇక ఈశ్వరుడే స్వయంగా అందించిన కవచం శ్రీ దుర్గాకవచం . ఇంకా నారద మహర్షి ఇచ్చిన గరుడ కవచం, కాశ్యపముని అందించిన నారాయణ కవచం వంటి శక్తివంతమైన కవచాలు ఎన్నో ఉన్నాయి . 

ఇవన్నీ అద్భుతమైన ఫలాన్ని అనుగ్రహించేవే ! వీటిని శ్రద్ధగా , భక్తిగా చేసుకోగలిగితే ఖచ్చితంగా శరీరానికి కవచమై కాపాడతాయి .  మన శరీరంలో ప్రతి భాగాన్ని- అంతరంగ, బహిరంగ అంగాలను కూడా భగవంతుడు ఏవిధంగా కాపాడతాడో వివరిస్తూ ఆయా ఋషులు ( ఆ కవచాన్ని మనకి ప్రసాదించిన వారు) కవచంలో దేవతా శక్తిని అద్భుతమైన రీతిలో కీర్తిస్తారు . 

ఉదాహరణకి ప్రహ్లాదుడు చెప్పిన దివ్యమైన నృసింహ కవచం ఒక్కసారి ధారణ చేస్తే, శరీరమంతా మంత్ర శక్తితో నిండిపోయి శరీరం కవచాన్ని తొడుక్కునట్లుగా కాపాడబడుతుంది.  ఎటువంటి సూక్ష్మ శక్తి కూడా మనల్ని బాధించకుండా రక్షించే ఒకానొక మహిమ ఈ దివ్యమైన కవచంలో నిక్షిప్తం చేసి ఉంచారు. ఇక్కడ భగవంతుని స్వరూపాన్ని కూడా అర్థం చేసుకోవాలి . 

ఆకారం కలవారు నరులు, జీవులు అనుకుంటే, అటువంటి ఆకారమే లేని నిరాకార నిర్గుణ శుద్ధ చైతన్యమే ఆ పరంథాముడు. ఆ  స్వామి ఆకారం ఇతర జీవుల లాగా, జడాకారం కాదు. సంకేత రూపం . విశిష్టమైన, శ్రేష్ఠమైన సింహ తత్త్వం. అది నిరాకార నిర్గుణ తత్వానికి అభిన్నం. వట్టి నారదు కాదు, శ్రేష్ఠమైన నృసింహుడు ఆయన. సత్యము ఆనందము కలిసిన చైతన్య విగ్రహం నృసింహ దైవం. ఈ కవచాన్ని రోజూ స్మరిస్తే, అటువంటి వారి చెంతకి రోగమే కాదు, రోగం గాలి కూడా రావడానికి భయపడుతుంది . 

ఇది నృసింహ కవచాన్ని ఉన్న ప్రత్యేకత. కవచాలు దాదాపు అన్ని కూడా మంత్రగర్భితాలు. భక్తితో , నిష్ఠగా చేస్తేమాత్రం వీటికన్నా ఫలదాయకాలు , గొప్ప ప్రయోజాకారకాలు, ముక్తిప్రదాయకాలు మరొకటి ఉండవు. ఇహపరసుఖములనిచ్చే వారధులు అని చెప్పుకుంటే అతిశయోక్తికాదు .  కాబట్టి మీకు నచ్చిన దైవానికి సంబంధించిన కవచ స్తోత్రాన్ని మీ రోజూ వారీ పూజలో చేర్చుకొని చక్కగా సాధన చేయండి. 

భగవంతుడు  కరుణా రస పరిపూర్ణుడే ! ఆయన కరుణామృతాన్ని స్వీకరించడానికి మనకి కావలసింది కేవలం పూర్ణమైన భక్తి అనే పాత్ర . అది  ఉంటె,అంతులేని ఆ అమృతాన్ని తాగి జన్మ , మృత్యు చక్రం నుండీ ఎంచక్కా బయటపడొచ్చు .

శుభం !!  

Kavacham.

Do you know about Kavacham?

#kavacham